هل يتقدم جمال الوالى با ستقالته قبل لقائى الجزائر!
·
المسألة كانت واضحة وضوح الشمس وماكان هنالك جديد فى موضوع الأستقاله
أو (الكموفلاش) قبل الوصول لدورى المجموعات.
·
القصة وما فيها كان الخوف شديد من لقاء (التراجى) فاكرو الوالى ترجى
زمان، فاذا خسر الوصيف تم تثبيت الأستقاله والأصرار عليها، وأذا عاد منتصرا، عاد
الى موقعه سالما، بناءا على طلب الجماهير ومن خلال المسيرة المليوينة و(عاش ابو
هاشم .. عاش ابو هاشم).
·
فالمشاكل فى الوسط الرياضى ياها ذاتها المشاكل.
·
والصرف ياهو الصرف من رجل واحد ومن جهة واحدة.
·
والوالى ظل فى منصبه نفسه الذى تعاقب عليه 6 رؤساء هلالاب.
·
بعظمة لسانه أعترف بان ذلك التنوع والأحلال والأبدال وكثرة ارجال فى
بيت (الزعيم) الهلالى، هو ما جعل ذلك الزعيم يقدم الكثير فى بطولة الأندية الأبطال
ويحجز لنفسه تصنيفا متقدما بأستمرار من قبل (الكاف) أو (الفيفا) كما حدث بالأمس وفى
ذات الوقت ايمنح السودان دون من أو سلوى اربعة مقاعد.
· مع اصرارى على أن يطلب
اتحاد كرة القدم السودانية من الكاف اكتفاء السودان فى الوقت الحاضر بمقعدين فقط،
حتى تتغير المنظومة الكروية عندنا وتسمح لأربعة أندية بتقديم مستوى يشرف السودان
لا أن تكون تلك الأندية (تمومة جرتق) وأن تخرج باستمرار فى الدور التمهيدى أو الذى
يليه وكلما عكس (الزعيم) صورة مشرفة شوهها ناد من ناس (تمومة الجرتق).
·
فالذى حفز (الوصيف) ورفع من مستواه غيرته من (الزعيم) وهو يحلق وحده
فى الفضاءات الأفريقيه يبدع ويمتع.
·
وبحمد الله (الوصيف) الأبدى، نفسه بدأ يسلك طريق الهلال بعد أن استفاد
من نجوم الهلال وخبرتهم فى الميادين الأفريقيه، رغم أننا نرى بأن بنزينهم شطب ولا
يمكن أن يفيدوا الزعيم لكن بدون شك يمكن أن يفيدوا (الوصيف).
·
واحد وصيفابى يطلع يقول ليك ما برضو ناس الهلال ضموا فى كشوفاتهم
لاعبين من المريخ، لكن الحقيقة هى أن الفرق يكمن فى أن لاعبى الهلال لم يكونوا
معروفين أو مشهورين فمنحهم الهلال اسمه وقدمهم افريقيا فى اقوى بطولة، ودمحهم فى
مجتمعه الراقى، فاصبحوا نجوما، أما الهلال فعادة يحصل على لاعب لا يقيمه المريخاب
التقويم الصحيح، مثل الشغيل وحموده، فيتضح انهم لا زالوا بخير .. أمسكوا فى الباشا
قوى.
·
ولمن لا يعلمون الخبايا فالباشا شطبه (هيثم مصطفى) من كشوفات الهلال
وهو لا زال يافع سامحه الله ون يغالط يسالأ الباشا نفسه ومعه (باسطاوى).
·
ارجع مرة ثانية (للتصنيف) طالما العالم كله بعرف على مدى عشرات السنين
أن زعيم السودان والأفضل تصنيفا هو (الهلال) فلا حاجة لنا فى الكاسات الوصيفه
والسيكافيه ومبروك على (العالمى) الوصيف تلك الكأسات الوصيفه ومعها 10 سيكافا!
·
على كل حال وصراحة (الزره) شديدة وكثير من الغافلين ما شاعرين بيها،
لذلك نايمين فى العسل وفرحانين بهزيمة (أهلينا) الخرطومى (ومريخهم) الكوستاوى .. أعتقد
الشاعر بيها (صلاح أدريس) وحبيبه تكعيب (جمال الوالى) رئيس طوالى .. هسه الدخل
(صلاح أدريس) هنا شنو .. الدخلو براهو (الشاعر) بيها وملحنها كمان .. فالهلال
اتخارج من اصعب لقاءات مجموعته مبكرا، ما تقول لى (مازيمبى) ضعيف، الهلال هو الكان
قوى ولو الزعيم خلاهو يفرفر بكره بتلقو الكاس دخلت دولابه.
·
عل كل حال ما تعملوا (طناش) لقائى الوصيف فى الجزائر الأثنين كل واحد
أصعب من التانى، وأنا خائف من الخروج المبكر يبدا من هناك وبالمباريتين – لا سمح
الله - والمشكله ما فى دى المشكله أن قطر (سيكافا) عد وفات وما بتلحق الا ناس
الأتحاد يعملوا خط رجعه أو زى ما عملوا مع (الأمل) المظلوم.
·
هى فائدة لجنة الأستئنافات شنو لو من اصدر القرار الأول لا يعمل
بقرارها؟
·
هل سمعتو محكمه ابتدائية رفضت حكم قاضى أستئناف؟
·
افتكر بطولة (البحر الأبيض المتوسط) لا زالت موجوده، لكن نحنا الدخلنا
شنو فى البحر الأبيض المتوسط؟
·
أقصد بطولة وادى النيل، هل تذكرونها تلك هى البطولة التى ظهر فيها
(بكرى المدينه) والكلام ده منشور هنا، والمذيع المصرى، قال (حسام البدرى) محظوظ
عندو لاعب بمواصفات افريقيه، قوة وسرعة.
·
شفتو المصريين ديل شفاتة كيف؟
·
على كل لا أستبعد أن يجدد (الوالى) صلاحية الأستقالة قبل لقائى
الجزائر، مفتعلا أى سبب حتى لو صحفى (رتب) عملية استفزازية (مضروبة) تتبعها
أستقالة ، كان خرج الوصيف تصبح ساريه المفعول لكنه يعود بقرار رئاسى – الجماعة –
ما بفرطوا فى الأندية الكبيره وكان واصل يرجع منها برضو بقرارلكن المرة دى من الجماهير.
·
لكن ما كل مرة بتسلم الجرة.
·
نصيحتى ليكم قوموا على صلاتكم .. أو خلوا بالكم من الدورى الممتاز.
·
بتخيل لى (الزعيم) ما ح يشتغل بيهو كتير السنة دى.
·
سبحان الله (العقرب) أصبح معبود (الوصيف)، كتر خيرو جعل واحد صاحبنا
وصيفابى يهرول ويهرب بى جلدو، فكلما كنت أكتب واقول انه افضل مهاجم فى السودان،
كان يدخل يكتب فى جهل ساخرا ومستفزا.
·
اها اوريكم برضو افضل مدافع فى السودان منو؟
·
ده سر خلوهو تسمعوا بيهو فى التسجيلات القادمه.
·
دنيا .. المال عند بخيله والسيف عند جبانه.
تاج السر حسين – tagelsirhussain@yahoo.com
ليست هناك تعليقات:
إرسال تعليق