بشه صغيره كفايه علينا.
من قبل كتبنا عن قمة الأدب وأخلاق الفرسان .. كتبنا عن أدب المدائح، أما هذه المره فهى بلا منازع قمة (اللؤم) الشديد .. والدورى الممتاز رائح جاى !
المصريين الزول اللعاب زى (بشه) ومنقطه بقولو عليهو (لئيم)، زى ما نحنا المغلوب بنقول عليهو (ماكل نيم).
المصريين الزول اللعاب زى (بشه) ومنقطه بقولو عليهو (لئيم)، زى ما نحنا المغلوب بنقول عليهو (ماكل نيم).
نعم انتصر الهلال على الوصيف بثلاثه أهداف .. وكل هدف (حكايه) لكن على (الزعيم) أن يصالح جماهيره فى نهائى كأس السودان .. فالثلاثه شويه خالص .. والهدفين كثيره فى مرمى سيد البلد ولا يمكن أن تصدق حتى لو غنى (الكابلى).
قمة (اللؤم) فيها كثير من الدروس والعبر .. عندنا مثل قديم (مركون) بقول (الحريف) قدموا والحقو و(صاحب العقل يميز كما قال ابو نواس) .. والوصيف خلى يجيب القون الأول والحقو وفرتق شملو ورجع (مناديب) جامعة الدول العربيه الى بلدانهم .. عرفنا (رمزى) الطيب، جا من غزه .. الجواسيس كمان شنو؟
وعندنا مثل تانى لئيم لؤم شديد .. بقول (الخيل الحره بتجى فى اللفه) ودى كم لفه يا ربنا ياقادر؟
صحيح انه الزعيم انتصر بالثلاثه .. لكن الأثنين مزعلنى شديد وشاعر بأنى زى المهزوم .. معقوله الوصيف يسجل هدفين فى مرمى سيد البلد ؟
صحيح أنه الهدف الثانى من تسلل واضح وضوح الشمس فى منتصف النهار .. وبرضو يتكلمو عن التحكيم ما بختشو ناس كاس (مانديلا) التحكيمى وعبور الأسماعيلى عام 2007 الفضيحه .. وصحيح لو الولد (العقرب) كان لحق سجل الهدف فى (برج الجوزاء) أعنى مرمى الحارس (رمزى) الطيب .. اقصد رمزى (الصالح) كانت النتيجه حصلت 6 .. لكن ملفى مشكله (محاورة) سعيد السعودى بى 7 أقوان!
حارس مرمى من (فلسطين) ده جايبنو عشان يصد الأقوان ولا يجمع (الحجاره) ويرجعها للصفوه لمن تقوم على جنها ويغلبها التعملو ؟؟
3 اقوان ب 800 الف دولار وقون مضمون أكثر من الثلاثه ؟؟ والله كان دفعتوا لى (محمد كمال) 100 دولار كان طلع 2 منهم وكان طلع رأس العراضه أو طلع الشجره.
هم ناس (الأهلى المصرى) عوره ولا ما بعرفو كوره؟ !
قالوا ما عايزين (رمزى) الطيب وما عايزين (وارغو) الأول سببو معروف (جربو) وملصه كم مره ، لكن التانى سرو عند ناس (النظام العام) !!
هسه فى زول جاب سيرة زول غير (وارغو) فى الحته دى؟
بمناسبة الأتنين والله مزعلنى زعل لا ليهو اول ولا آخر .. تقول زى الهلال مغلوب أو (مجلود)، معقوله (الوصيف) يسجل هدفين فى مرمى الزعيم – البلد بقت فوضى؟
كدى اتخيل أنه المباراة مشت لضربات الجزاء ، والهلال أنتصر بضربات الجزاء، نودى وشنا وين مع ناس الأمم المتحده وهيومن رايتس وتش؟
لن ارضى اذا لم يصبح حال (الوصيف) أمام الزعيم مثل حال (الزمالك) مع أهلى مصر .. ناس الزمالك اصبحوا يفرحوا (بالدرون) واصبحوا لمن تجى سيرة الأهلى (يدنقرو) ويعارفوا بأنه سيدهم وسيد سيدهم!!
ميشو .. مدرب شاطر مافى شك وبدأ كويس لمن جانا من اديس ابابا كان بهاجم بى 5 لاعبين وقلنا الزول ده يا مجنون أوعرف سر الهلال وسحره .. وكرة القدم مدارس .. ومدرسة الهلال من الله خلقه (برازيليه) متعه وأهداف وهجوم متواصل .. أنا جنى وجن (الخندقه) والمدرب البهتم بالدفاع أكتر من الهجوم .. الهلال لو دافع بخسر طوالى .. وأهو غلبنا ثلاثه لكن خسرنا هدفين .. ما عارف (ميشو) عائز يرجع بينا لى زمن (كامبوس) و(ريكاردو) الله يطراهم بالخير، معقوله الهلال يهاجم طول زمن المباراة .. معقوله (الزعيم) محاصر (ضلو) شوط كامل ونصف، لكن معقوله (كاريكا) يكون لوحده يهاجم لحدى مع الوصيف يتطاول ويسجل هدف مبكر؟
قلنا واحد كمان يسجلو هدفين والله ده تطاول فات كل الحدود!
السنه المضت كان هداف الدورى الممتاز واحد .. المره الهدافين 3 (كاريكا) ومهند (المكجننو) وساسا دومبا .
والله (مهند) ده ولد طيب وخلوق وود حلال شديد .. لكن ابدا ما برتاح لمن اشوفو جوه الملعب، لأنه الكوره ما بتنقطع الا من (مهند) وما بتتحول لهجمه خطره على جبهة الهلال الا لمن تصل لمهند .. يا أخوانا ما تريحونا (الميرغنى) ده ما نازل وناقص!!
انا ماعارف (ميشو) ده مالو وبسمع كلام منو .. ميشوعندو اقوى تشكيله ممكن تهزم البرازيل بجلالة قدرها، ليه مصر على لاعب معين ومزود ضغطنا ومكرهنا حياتنا؟
يا هلالاب تابعوا برامج الرياضه المصريه .. اللاعب الما عندو (حلول) وقدرات دفاعيه وروح قتاليه اصبح لا ينفع حتى لو كان زى (ابوتريكه) منقطه!
يا هلالاب تابعوا برامج الرياضه المصريه .. اللاعب الما عندو (حلول) وقدرات دفاعيه وروح قتاليه اصبح لا ينفع حتى لو كان زى (ابوتريكه) منقطه!
يا ميشو .. عندك خليفه، وعندك يوسف محمد، وعندك سامى، وعندك ديمبا وعندك بويا وعندك مساوى، وعندك هيثم مصطفى، وعندك، بشه، وعندك عمر بخيت، وعندك علاء الدين يوسف (رغم انه بتلفسف مرات)، وعندك سادومبا، وعندك كاريكا، وعندك بكرى المدينه، وعندك النعيم .. وكان المعز قام على جنو عندك (جمعه) .. ديل كلهم عندك (مهند) ده لزومو شنو ؟؟ ومنو الفارضو على اى تشكيله تلعب؟؟
مهند ده قلنا ليكم حدو المباريات (الخفيفه) زى ما بقولو فى الملاكمه (وزن الريشه) مع اهلى مدنى واتحاد مدنى والميرغنى كسلا .. بسجل اقوان وبفرح الحبان ويقلب هوبه أن شاء الله يقلبها جوه جريدة (قون) أو قناة (قون) وأن شاء الله يصل عمود (محمد عبدالماجد) ذاتو .. المجننا هو (وقون) الغزال الغزال.
المباريات الأفريقيه واللعب ضد الوصيف عائز (شفوت) ومهند ما شفت .. مهند زى اولاد (الباشوات ) بلعب (الكوره) بى الشوكه والسكين.
على سيرة (باشوات) حقو الجماعه يرجعو (الباشا) لأنه (بله جابر) لاعب لا بضر لا بنفع .. بستلم الكوره كويس وبمشى بيها كويس .. لكن بعمل بيها شنو؟
ده سر يعرفو (كروجر).
يا ميشو وطارق .. اسمعو نصيحتى وجربو تشكيلتى فى كاس السودان، لو ما الوصيف (اتشلع) اكون (ضل) كبير ووصيف (صغير) وطيشابى بلا حدود!!
آخر كلام:-
· نعم بكرى المدينه ضيع هدف مضمون ما بضيع .. لكن واضح انه مهاجم مزعج، فى دقيقه وصل المرمى (مرتين) ما مشكله يضيع ، المهم يصل وصدقونى (بكرى) محتاج لثقة فى النفس ومشاركه منذ وقت مبكر ويضمن الا يتم تغييره .. الولد (العقرب) محتاج لثقه فى النفس لذلك مستعجل شويه، وهذه امر يعلمه من لعبوا كرة قدم!
· من يتحدثون عن (بكرى) عليهم أن يصبروا عليهم وأن يعلموا بأنه افضل من مهند الطاهر الذى صبرنا عليه عدد من السنوات ولا زلنا صابرين.
· اما بالنسبة للوصيف الأبدى اقول ليهم نصيحه .. امشوا اشتكو !!
· أشتكوا فى اى حاجه.. فى الحكم مثلا لأنه مرر ليكم اوف سائد وخلاكم اتعادلتو وخل الزعيم يفكر فى القون الثالت .. لو ما الحكم مرر (الأوف سائد) كانت نتيجة المباراة أنتهت 2/1!!
· الحكم مرر هدف تسلل لصالح المريخ ومرر (فنلة) رمزى (الطيب) لأنها بتشبه فنائل لاعبى (الداخل) فى المريخ، مفروض يطلب منه يغيرها!
· بالمناسبه (طيب) معناها مازى عندنا .. عند المصريين تعنى (أهبل).
تاج السر حسين - القاهره
ليست هناك تعليقات:
إرسال تعليق